အစှၤကတၢၢ်ပှၤအဂၤ ၄၀၀ ကဲထီၣ်ပှၤဟံၣ်ဃီတအိၣ် ခီဖျိမ့ၣ်အူအူအီၣ်ဟံၣ်လၢအဖျၢၣ်လၢအဆံ ဖဲနိၣ်ဖိဘၣ်ကီဘၣ်ခဲဒဲက၀ီၤ လၢကီၢ်ပယီၤ-ကီၢ်ကၠီၣ်
တဲၣ်ကီၢ်ဆၢ, အဂ့ၢ် ပှၤဘၣ်မူဘၣ်ဒါခိၣ်နၢ်တဂၤ လၢဟီၣ်က၀ီၤကရၢမၤစၢၤတၢ်, စံး၀ဲဖဲမုၢ်ယူာ်အနံၤလီၤ.

စီၤဘှဲၣ်စ့, လၢအမ့ၢ် ကညီဘၣ်ကီဘၣ်ခဲကမံးတံာ်နဲၢ်ရွဲၣ်, စံး၀ဲဟံၣ် ၈၈ ဖျၢၣ်ဟးဂီၤလၢမ့ၣ်အူအီၣ်တၢ် ဖဲမုၢ်ဆၣ်မုၢ်ဃ့ၢ်လီၤအဆၢ ကတီၢ်လီၤ.

"မ့ၣ်အူအီၣ်ဟံၣ်အါဖျၢၣ်, ဖဲကလံၤဆီၣ်မ့ၣ်အူအခါလီၤ. ဟံၣ်တနီၤနီၤ ဘၣ်တၢ်ရိၣ်လီၤအီၤ တချုးလၢတၢ်မၤပံာ်မ့ၣ်အူဘၣ်လီၤ." အ၀ဲဒၣ်စံး. "ဘၣ်ဆၣ်
တၢ်ဘၣ်ဒိဘၣ်ထံးမ့ၢ်ဂ့ၤ, တၢ်သံတၢ်ပှၢ်မ့ၢ်ဂ့ၤ တအိၣ်နီတမံၤလၢတၢ်ကဲထီၣ်သးအပူၤဘၣ်. တၢ်မနုၤဒုးကဲ ထီၣ်မ့ၣ်အူလဲၣ် ပတသ့ၣ်ညါဒံးဘၣ်,
မ့ၢ်လၢကၠီၣ်တဲၣ်ပှၤဃိထံသ့ၣ်ညါတၢ်တဖၣ် ဃုသ့ၣ်ညါတၢ်ဂ့ၢ်တၢ်ကျိၤအဖၢအဃိလီၤ."

ကၠီၣ်တဲၣ်ပၢၤကီၢ် ကွၢ်ဆိမိၣ်တယာ် တၢ်ဟးဂူာ်ဟးဂီၤလၢ ကဲထီၣ်သးခီဖျိ်မ့ၣ်အူအီၣ်တၢ်, ဒီးကမံးတံာ်ဟ့ၣ် တၢ်အီၣ်တၢ်အီဒီးတၢ် အိၣ်ကဒု
လၢပှၤဘၣ်ကီဘၣ်ခဲ လၢအဟံၣ်ဃီၡူသ့ၣ်တဖၣ်အဂီၢ်လီၤ.

နိၣ်ဖိမ့ၢ် ဘၣ်ကီဘၣ်ခဲဒဲက၀ီၤဖးဒိၣ်တဖျၢၣ် လၢအူၣ်မ်ဖၤကီၢ်ဆၣ်, တးကီၢ်ရ့ၣ်အပူၤ လၢကီၢ်ကၠီၣ်တဲၣ်မုၢ်နုာ်တခီပၤ, လၢအိၣ်သူၣ် လီၤအသး ကွၢ်ဆၢညါ
လိာ်အသးဒီးကညီကီၢ်စဲၣ်လီၤ.

ဒဲက၀ီၤတၢ်ဒုးအိၣ်ထီၣ်အီၤဖဲ ၁၉၉၇, ခီဖျိတၢ်ပာ်ဖှိၣ်ဃုာ် ဘၣ်ကီဘၣ်ခဲဒဲက၀ီၤခံဖျၢၣ်လၢဟီၣ်က၀ီၤအပူၤ လၢအအိၣ်ထီၣ်အပူၤ ကွံာ်ယဲၢ်နံၣ်အခါလီၤ.
ပှၤဘၣ်ကီဘၣ်ခဲအိၣ် ၁၅,၀၀၀ ဂၤ, အါန့ၢ်ဒံး ၈၀ မျးကယၤမ့ၢ်ကညီကလုာ်သ့ၣ်တဖၣ်, အဂ့ၢ် Myanmar Border Consortium ကရၢစံး၀ဲလီၤ.